ريحة الحسين
يا قاهرة
الله علي ريحة الحسين الساحرة
حدفت في قلبي فرحتين
و بسمتين
فتحت في عمري شباكين
و أبواب كتيرة
من زمان متقفلة
فتحت عيوني
بين محبة مصهللة
يا قاهرة
يا اللي في حلمي المستخبي
في قطر عمري
يا محطة الشوق
للأوليا
سحباني بين لهفة
وجود الأمكنة
بين الشوارع و الصور
و عطر القلوب
يا قاهرة
الروح تدوب
في البعد عنك
تتمني يوم لقاها منك
انتي ما بيني في الفؤاد
و عشقي ليكي دا المراد
آه يا قمر
فارد دلاله ع البيوت
همسات ترفرف ف الضلوع
تلمح حنين مالوش حدود
يا قاهرة
مدي لي ضلك
دخليني في قلب حضنك
و ازرعيني سنبلة
أيوة أنا
حلمي هنا
و بين ضلوعي شوق دفين
لريحة الحسين
يا قاهرة
أنا بانقسم
بين غربتي
و لهفتي مشبكة فيكي الغرام
و الأنسجام
و بينفرط مني الكلام
علي شط نيلك يا سلام
علي طعم اللقا و الدندنة
موجة مشاعر
حاجات قديمة انما
داخل كياني مزمنة
ليها رنين
جوه السنين المؤمنة
ساعة الأدان
ريحة الحسين
حاضنة الحياة
ف طوق نجاة متطمنة
يا قاهرة
باهرب معاكي ف رقتك
توحشني أكتر ضحتك
صوتك و روحك خطوتك
بتمدي فيا شوق عفي
بيتنقش ما يختفي
يا طرحة بيضة مطرزة
بحب الوجود
وشوش يا حلمي سكتي
يالا يا رحلة نبتدي
سكة سفر للقاهرة
و ريحة الحسين الآسرة
يا قاهرة
بتشاغلي ليه قلبي الصغير
يرتجف ساعة وصولي
يأتلف و ما بنختلف
حتي ساعات وقت العفار
و التراب و يا التعب
بين الصخب بابقي كاطفلة
ف حضن أمها
بتنام و تحلم باللعب
حتي زحامك و يا جمالك
آه م الهنا
باشتاق اليه
يا قاهرة
و يا الهناجر بابقي مهاجر
أتمني أعيش بين فنها
و الفنانين و الرسامين
و يا المعارض و المسارح
و الجناين و الصبا
و الملامح طيبة
يا قاهرة يا قريبة
ساكنة الوريد
و الف عيد
يرقص في قلبي و سكتي
ياخدني من حالي الي
ذكري حنين
ما بين سنين
الفاتحة ليك
يا سيدنا الحسين
يا قاهرة
علي الفيشاوي
خان الخليلي
يا محلا ليلي
و شموع دموعها ف حضنها
و تراث بيحكي اهلها
طعم الرضا بين سحرها
آه يا حسين
ساعة الصلاة
فاردة الحياة
بتقول آمين
يا مؤمنين
الله علي ريحة الحسين
0 التعليقات:
إرسال تعليق