أحدث قصائد الشاعرة إيمان يوسف
صديقتى المسيحية
أنا وهى أصحاب
جمعتنا الحياة أحباب
مهما كان للحزن باب
والتطرف دار ينخر بالعذاب
سهم فينا يترشق يهدم مالينا
جه يدمر عمرنا أدام عينينا
إرهاب غراب
أنا وصديقتى
من زمان أصحاب
اعترضنا
كانت الصرخة بتدوى
باحتضار وافترضنا
كانت الدهشة فى حوارنا
لانت الأزمة بسلامنا
روحنا تنهض بالتسامح
ف الضماير رفض جامح
ليه نكون أغراب واحنا
عمر يجمعنا التصالح
قلنا لا
بحق الصداقة والحياة
مصر بينا
والحضارة والثقافة
والعمار ضلل علينا
فكرنا بقى أولى لينا
مصر أكتوبر يا مصرى
هي عصرك هي عصرى
مصر مسلم مع مسيحى
لو جريحك أو جريحى
مصر وحدتنا أصالة
كل شارع كل حارة
فرحى فرحك حزنى حزنك
همى همك وطنى وطنك
للتعايش ألف جارة
فلسفة حب ومرارة
مجتمع شامل بقائنا
كل أزماتنا وولائنا
كل معاناتنا انتمائنا
هم واحد عمر واحد
بين هلالنا أو صليبنا
رب واحد
والوطن فى الأصل واحد
رب واحد
والوطن ف الأصل واحد
*********************
إيمان
أحمد يوسف : من
مواليد الإسكندرية حى الشاطبى حاصلة على بكالوريوس إعلام جامعة القاهرة وعضو اتحاد
كتاب مصر وعضو المنظمة العالمية للكتاب الأفريقيين والآسيويين وعضو جمعية المبدعات
المصريات ولها العديد من الدواوين«مشاعر» و«تنهيدة صبية» و«الصقر»
ـ نُشرت فى جريدة المصرى اليوم 8/4/2013
ـ ونُشرت فى موقع دنيا الرأى على الرابط التالى :
